Vieiros

O Certificado en Lingua Galega (Celga) é o novo sistema de certificación adaptado ao Marco Europeo Común de Referencia para as Linguas (MECRL). Expedido pola Secretaria Xeral de Política Lingüística da Xunta de Galicia, é o diploma oficial que certifica o nivel de coñecemento de galego a efectos de requisitos ou méritos laborais e académicos.

Os exames da segunda convocatoria anual dos Celga, nos niveis 1, 2, 3 e 4, terán lugar entre novembro e decembro de 2008, e en Cataluña desenvolveranse na Facultat de Lletres da Universitat Autònoma de Barcelona. As solicitudes de inscrición poden presentarse até o vindeiro 19 de setembro.

Para obter ao certificado só se require ser maior de 16 anos e pagar as correspondentes taxas por dereitos de exame (15,30 euros). Cómpre presentar unha fotocopia do DNI, o formulario de solicitude de inscrición debidamente cuberto e o xustificante do pagamento das taxas dentro do prazo estabelecido. En Barcelona esta documentación pódese entregar no Departamento de Galego da UB ou no Lectorado de Galego da UAB.