Vieiros

O ministro do Poder Popular para o Traballo e Seguridade Social de Venezuela, Roberto Hernández, declarou onte martes que o proceso xudicial contra os cinco cidadáns cubanos na cadea en Estados Unidos (EUA) viola os principios elementais en materia de dereitos humanos (DDHH).

Estas declaracións expresounas o ministro do Traballo despois dunha xuntanza con familiares de Los cinco, xuntanza na que expresou a súa solidariedade e indicou que en Venezuela a Asociación Bolivariana de Abogados prepara un obradoiro para demostrar con argumentación xurídica a situación dos antiterroristas cubanos, salientou a Agencia Bolivariana de Noticias.

Segundo explicou a nai de René González, un dos cinco detidos en EUA, Irma Sehwerert, os cidadáns foron arrestados tras achegar información ás autoridades de Estados Unidos de accións terroristas de grupos anticastristas e por ese feito están detidos.

Hernández considerou que Estados Unidos non ten moral para axuizar aos Estados sobre o seu cumprimento dos dereitos humanos, mostra diso é o caso dos cinco cubanos, que aínda non conseguiron das autoridades estadounidenses o permiso para a visita dos seus familiares.

Dende 1998 os cidadáns Gerardo Hernández, Ramón Labañino, Antonio Guerrero, Fernando González e René González, coñecidos en Cuba como Los cinco héroes, están detidos en cárceres do estado da Florida, Estados Unidos, e esperan que para comezos de decembro a defensa presente un recurso ante a Corte Suprema de Estados Unidos para determinar a súa situación.