Vieiros

Mikel Laboa faleceu esta madrugada aos seus 74 anos. Deixa quince discos publicados, e temas clave no imaxinario social do seu país, como Txoria txori ou Baga, biga, higa. Laboa fira distinguido recentemente coa medalla de ouro de Gipuzkoa, máximo galardón que outorga a Deputación Foral, e que el mesmo pretendía recoller nunha cerimonia solemne prevista para o vindeiro 23 de decembro.

Durante os anos 60 fundou cana a outros artistas o grupo cultural Ez Dok Amairu, que procuraba unha revitalización da cultura vasca dende distintos eidos artísticos, facendo especial fincapié na recuperación e dignificación da lingua. Laboa converteuse, con Benito Lertxundi, no máximo expoñente da 'nova canción vasca'. O seu disco Bat-Hiru (1974) foi elixido 'mellor Disco Vasco da Historia' nunha votación popular do Diario Vasco. Txoria txori, a súa canción máis coñecida, chegou a ser interpretada por Joan Baez coa súa letra orixinal en euskera. entre as súas últimas actuacións destaca o Concerto pola Paz, celebrado en Donostia no verán de 2006, e no que Laboa exerceu de teloneiro de Bob Dylan.

A voceira do Goberno vasco e conselleira de Cultura, Miren Azkarate, declarou que o falecemento de Mikel Laboa é "unha gran perda para a cultura vasca" e anunciou a intención do Goberno vasco de se poñer en contacto co resto de institucións para realizar un acto de recoñecemento. El alcalde de Donostia, Odón Elorza, lamentou "de todo corazón" a morte de Laboa, a quen cualificou como "un artista profundamente innovador".