O presidente deposto de Honduras, Manuel Zelaya, foi designado polo Goberno revolucionario de Venezuela coordenador-xefe do Consello Político de Petrocaribe para todos os procesos de fortalecemento da independencia política e a defensa da democracia popular no Caribe e Latinoamérica.
Petrocaribe é unha alianza estratéxica creada o 25 de xuño de 2005 que subministra petróleo venezuelano, a prezos preferenciais, a todos os Estados asinantes do Acordo que son: Antigua and Barbuda, Bahamas, Belize, Cuba, Dominicana, Grenada, Guyana, Honduras, Xamaica, Surinam, Santa Lucía, Saint Kitts and Nevis e Saint Vincent and the Grenadines, só Barbados e Trindade e Tobago non asinaron o acordo e Honduras está suspendida na súa membresía polo golpe de Estado contra o presidente lexítimo Manuel Zelaya.
O ministro de RR.EE. de Venezuela, Nicolás Maduro, deu a nova do nomeamento de Zelaya para o cargo. Maduro declarou que o nomeamento é resultado das conversas do presidente venezuelano, Hugo Chávez, co presidente desposto de Honduras Manuel Zelaya: "decidiuse a constitución dun Consello Político para a defensa da independencia e a democracia no continente de Petrocaribe", declarou o ministro..
Petrocaribe: algo máis que venda de petróleo
Petrocaribe nace por iniciativa do Goberno Revolucionario Bolivariano para estabelecer mecanismos solidarios que axuden á transferencia de recursos enerxéticos e hidrocarburos a países da rexión nun esquema de intercambio favorábel, equitativo e xusto para preservar a soberanía dos pequenos Estados do Caribe e a súa independencia.